«Quai che nus prestain en la ‹Arena› è lavur da translaziun»

Tenor il WEF è la polarisaziun actualmain in grond ristg per la societad. Emissiuns politicas pon gidar a cumbatter posiziuns extremas e minimar quest ristg. In exempel è la «Arena». La prioritad numer in da l’emissiun saja da pussibilitar da furmar in’opiniun equilibrada, di il moderatur Sandro Brotz.

Nus vivain en in mund fitg cumplex . Quai ves’ins en noss sistem democratic: set cusseglieras e cussegliers federals da quatter differentas partidas portan la responsabladad per las quatter regiuns linguisticas. 18 partidas en il parlament represchentan ils interess da la populaziun che viva en las citads, sin la champagna, en las muntognas ed en las valladas, ch’è influenzada da l’immigraziun e che mantegna a medem temp sias tradiziuns.

La polarisaziun da quest mund cumplex  capita cun maletgs ed emoziuns, ella sa furma en medias socialas ed en forums d’internet, nua che las opiniuns valan savens dapli ch’ils fatgs. Tenor il Forum mundial d’economia (WEF) è la polarisaziun il terz grond ristg dal proxim futur. La polarisaziun na pon ins numnadamain betg contemplar separadamain, ella vegn accumpagnada d’infurmaziuns falladas, da recessiuns economicas, da diminuziuns  dals dretgs umans e da violenza en l’intern dal pajais.

Studi da l’EBU: Las medias sco bastiun cunter la polarisaziun

In studi da l’Uniun europeica da radio e televisiun (EBU) ha analisà la rolla da las emissiuns politicas en la televisiun ed en il radio en quest connex. Il studi metta il focus sin l’Uniun europeica e n’examinescha betg la situaziun specifica en Svizra. Tuttina èn in pèr da las constataziuns er interessantas per la SRG SSR. Tenor il studi giogan las medias publicas e dal dretg public ina rolla decisiva en il cumbat cunter la polarisaziun. Chasas da medias sco la SRG SSR han in grond radius d’acziun e pon unir ils umans. Ellas sveglian ed augmentan en pli lur interess per la politica. Quai è in factur decisiv per impedir la polarisaziun. Cun restar fidaivlas als fatgs e rapportar transparentamain reduceschan ellas la disfidanza e promovan la cumpetenza da s’infurmar. Quai sustegna la depolarisaziun da las societads e garantescha ina stabilitad politica e democratica a lunga vista.

La rolla da la «Arena» per la politica svizra

La «Arena», in’emissiun da discussiun politica sin SRF 1 mussa quai a moda chapibla. Persunas da la politica, persunas dal fatg e persunas pertutgadas discuteschan mintgamai live davant in public davart temas actuals. «Il pli impurtant è la furmaziun da l’opiniun equilibrada», di il moderatur Sandro Brotz. «Quai che nus prestain en la ‹Arena› è lavur da translaziun: l’emissiun gida la glieud da chapir co che la politica funcziuna. Las aspectaturas ed ils aspectaturs duessan il davos chapir tge ch’ina votaziun munta per els.»

Il num «Arena» n’han ins betg tschernì casualmain. Las scenas regordan savens a cumbats da lutga. Quatter fin otg contrahent:as stattan visavi in:a a l’aut:ra, l’atmosfera è savens confruntativa, las discussiuns èn vivas. Quai vala en spezial per las emissiuns curt avant las votaziuns – las uschenumnadas «Arenas da votaziun».

Sche arguments siglian in cunter l’auter

Ma era tar auters temas vegn bainduras cumbattì rigurusamain. Per exempel cura ch’i va per la finanziaziun da l’armada en vista a la guerra en l’Ucraina, il tema da l’emissiun dals 20 da settember. Las contrahentas eran la vicepresidenta dals Verds, Marionna Schlatter, in’adversaria dal rearmament da l’armada e la filosofa Katja Gentinetta che sustegna il rearmament:

Sandro Brotz: «Pudais Vus responsar che l’armada va a frusta, dunna Schlatter?»
Schlatter: «L’idea che la pitschna Svizra sa zuglia en e vegn da sa dustar uschia encunter in agressur sco la Russia als cunfins – tenor mai è quai passà. La Svizra è in pajais pitschen. Nus essan amez l’Europa, nus avain in privilegi geografic. … Nossa segirezza e nossa stabilitad na dependan betg da noss’armada e sia capacitad d’intimidar, mabain da la rolla che nus avain sin il mund. …»
Gentinetta: «Sche Vus schais che Vus na sentias betg la situaziun da smanatscha e che quai na giaja tiers a nus nagut, lura aud jau quasi sco eco in snegader dal clima. … »
Brotz: «Pia, dunna Schlatter smanzegna per uschè da dir la smanatscha…?»
Gentinetta: «Na, exact quai n’hai jau betg vulì dir! Jau di ch’i tuna in zic uschia sco sch’ins schess: ‹Tut quai che las expertas ed ils experts din, na crai jau simplamain betg.› E quai chat jau schont interessant.»
Schlatter: «Quai è in’inculpaziun cumplainamain faussa. Jau vom cun egls averts tras il mund. La differenza è mo quella: tge rolla pudain nus giugar per la segirezza sin il mund? … Qua sun jau persvasa che nossa fermezza na giascha betg en il militar.»

En la furia n’èn fatgs betg adina da separar dad emoziuns, las contrahentas ed ils contrahents interrumpan e curregian in l’auter, vegnan grits – lura intervegn il moderatur Sandro Brotz.

Ch’i saja uras da laschar discurrer tschella vart, di el e mussa il temp da discurrer. A la fin d’ina emissiun duessan aderentas ed adversaris avair survegnì circa tuttina bler temp per lur arguments. «Jau sun persvas», di Brotz, «che nossas debattas en la ‹Arena› reveleschan la quintessenza da la chaussa.»

La polarisaziun cumenza gia avant la discussiun

La «Arena» è adina puspè exposta a gronda critica. Ella sa movia memia fitg a sanestra u a dretga, na saja betg equilibrada u tschernia a moda memia omogena ses giasts. «Savens datti commentaris gia avant che la discussiun ha insumma cumenzà», constatescha Brotz. «Uschespert che jau preschent il line-up da la proxima ‹Arena› datti reacziuns. Ma quai cumprova era la relevanza da l’emissiun.»

Il studi da l’Uniun europeica da radio e televisiun considerescha Sandro Brotz en il context svizzer dentant plitost a moda critica. Tenor el èsi difficil da prender quel sco basa per examinar las relaziuns svizras. «Cun il Cussegl federal, la furmla magica ed ils meds da la democrazia directa sa differenziescha noss sistem cumplettamain da quels dals stadis da l’UE», declera el. Perquai saja, or da sia perspectiva persunala, deplazzà da metter la PPS e la AfD sin il medem stgalim .

La «Arena» sco spievel da la societad

Dapi sia fundaziun il 1993 porscha la «Arena» ina maschaida d’inscunters, barats, arguments e divertiment. Sandro Brotz, che moderescha dapi il 2019 l’emissiun, numna questa cumbinaziun in «tetris politic»: mintga part sto constar, dals giasts sur ils temas fin a la participaziun dal public.

La «Arena» sa mova al puls dal temp. Ella tematisescha quai che muventa actualmain ils umans. Quai munta dentant ch’il team da redacziun cun tschintg plazzas cumplainas lavura sut fitg auta pressiun. El sto envidar ils giasts, retschertgar temas, tscherner studis e cifras ed auter pli. «Mia incumbensa principala», di Brotz, «è dad anticipar tge ch’ils giasts pudessan dir il venderdi saira – e la finala dad esser preparà il meglier pussaivel per tut las tenutas ed eventualitads.» Da moderar la «Arena» pretenda in grond inschign schurnalistic. Las participantas ed ils participants na dastgan betg guntgir dumondas criticas u laschar ora parolas absurdas.

Il parlament da giuventetgna a Schaffusa festivescha sia renaschientscha
La «Arena» motivescha sias aspectaturas e ses aspectaturs tranter auter da sa participar a moda activa al process democratic. Quai mussa in exempel da Schaffusa: ina gruppa da glieud giuvna, ch’è sa participada ad in’emissiun, ha udì ch’il parlament da giuventetgna da Schaffusa saja senza commembras e commembers. Otg da questas persunas giuvnas, il pli giuven ha 18 onns, han quest onn puspè dà vita al parlament.
Quai è il pli grond cumpliment per Brotz. «La participaziun a las votaziuns ed elecziuns plitost bassa en Svizra ma fa quitads», conceda el. «Perquai èsi fitg impurtant ch’ins po fascinar la glieud giuvna per la politica.»

Noemi Harnickell, 2024